ისწავლე

JavaScript-ის პროექტში დამატება

როცა ბრაუზერი ტვირთავს HTML ფაილს, ამ დოკუმენტშივე შეიძლება იყოს დართული ინფორმაცია CSS-სა და JavaScript-ზე, სახელდობრ, როგორ ჩაიტვირთოს და გაეშვას ეს ფაილები. ბრაუზერში შესაძლოა JavaScript ჩაიტვირთოს მანამ, სანამ სხვა HTML ელემენტები ჩაიტვირთება ან მას შემდეგ. ეს ყველაფერი დამოკიდებულია იმაზე თუ როგორი შედეგის მიღება გვსურს. ხშირ შემთხვევაში JS დანიშნულება არის დინამიურად შეცვალოს HTML და CSS ვებგვერდზე DOM-ის გამოყენებით, ამიტომ ჯავასკრიპტს ვტვირთავთ დოკუმენტის ჩატვირთვის შემდეგ (ბოლოში).

დოკუმენტში JavaScript-ის დასამატებლად ვიყენებთ script თეგს, სადაც შეიძლება პირდაპირ კოდის დაწერა, ან ცალკეული სკრიპტის ფაილის შემოტანა.

ჩვეულებრივ, script ელემენტს განვათავსებთ დოკუმენტის ბოლოში, <body> თეგის დახურვამდე.

HTML
<body>
  <h3 id="#cool-heading"></h3>

  <script>
    // კოდი, რომელიც სათაურში ტექსტს ჩასვამს
    const h = document.querySelector('#cool-heading');
    const letters = 'გამარჯობა'.split('');
    let index = 0;
    setInterval(() => {
      if (index < letters.length) {
        h.textContent += letters[index];
        index++;
      } else {
        index = 0;
        h.textContent = '';
      }
    }, 500)
  </script>
</body>

ბრაუზერი ჩატვირთავს დოკუმენტს, და როგორც კი სკრიპტის თეგებს მიადგება, მაშინვე გაუშვებს მას. შედეგად მივიღებთ:

შეგვიძლია სკრიპტში გარეგანი ფაილიც შემოვიტანოთ, რომლის მისამართსაც src ატრიბუტში მივუთითებთ:

HTML
  <script src="./main.js"></script>
</body>

თუ პატარა და მარტივ სკრიპტებს ვწერთ, მისაღებია პირდაპირ თეგებში კოდის წერა, თუმცა ხშირ შემთხვეაში საკმაოდ ბევრი კოდი გვიგროვდება, რის გამოც სკრიპტების ცალკე ფაილებში გატანა უმჯობესია.

კომენტარები

თითქმის ნებისმიერ პროგრამულ ენაში შეიძლება კომენტარის დაწერა. როდესაც კოდი მოთავსებულია კომენტარის აღმნიშვნელ ბლოკში ან სტრიქონში, ბრაუზერი მას დააიგნორებს. კომენტარის დანიშნულებაა კოდის აღწერა, შენიშვნების დატოვება, კონკრეტული კოდის ნაწილის დროებით გაუქმება და ა.შ.

ერთ ხაზიანი კომენტარი იწყება ორი დახრილი ხაზით (//):

JS
// console.log('Hello world');

მრავალხაზოვანი კომენტარი იწყება /*-ით და მთავრდება */-ით:

JS
/*
  console.log('Hello world');
  console.log('Hello world from Educata');
*/